A Xunta de Galicia pon en marcha estes apoios coa intención de modernizar o sector e facelo máis competitivo, promovendo a oferta de produtos de calidade e deseños únicos que melloren a experiencia de compra. A dixitalización é outra das ferramentas clave para afianzar o recoñecemento dos establecementos comerciais retallistas galegos e o seu posicionamento no mercado, obxectivo prioritario da convocatoria.

Comercio e artesanía deben amoldarse a unha realidade que cambiou substancialmente durante os últimos anos, así como dar resposta aos novos hábitos de compra dos consumidores. Para iso, é esencial a introdución de novas tecnoloxías dirixidas a transformar dixitalmente os seus negocios de forma progresiva e ese é precisamente o obxecto destas axudas.

En que consisten as axudas?

O programa conta cunha dotación de tres millóns de euros, cantidade que se poderá incrementar en función das solicitudes presentadas e de acordo coa dispoñibilidade de crédito. A convocatoria establece dous módulos diferentes e os solicitantes optarán a un ou outro dependendo do seu grao de dixitalización:

• Módulo I: dixitalización básica da contorna comercial omnicanal e posta en marcha da actividade comercial con venda en liña.
• Módulo II: mellora de ferramentas de márketing dixital e sistemas dixitais e outras actuacións de dixitalización comercial.

Quen pode solicitalas?

As axudas diríxense a talleres de artesáns que estean inscritos no Rexistro Xeral de Artesanía de Galicia e a comerciantes retallistas que cumpran os seguintes requisitos:

• Que desenvolvan a súa actividade comercial e teñan domicilio social en Galicia.
• Que non teñan a consideración de gran establecemento comercial.
• Que teñan a condición de peme.
• Que teñan un número de empregados/as igual ou inferior a 20.
• Que estean dados de alta nalgúns dos epígrafes do IAE que se relacionan nos anexos II e III da convocatoria, que se poden consultar nesta ligazón.
• Que desenvolvan a actividade para a que vai dirixida a subvención.
• Que desenvolvan a actividade comercial nun establecemento comercial cunha superficie de exposición e venda igual ou inferior a 300 metros cadrados.

Como solicitalas?

As solicitudes poderán enviarse ata o 28 de marzo e terán que axustarse ao modelo normalizado que se inclúe como anexo IV da convocatoria. Os interesados deberán presentalas obligatoriamente por medios electrónicos, a través do formulario dispoñible na sede electrónica da Xunta de Galicia.

Máis información: https://galiciaempresa.xunta.gal/detalle-procedemento?codtram=CO300C&ano=2023&numpub=1&lang=gl