O Grupo Emenasa, experto en robótica industrial, e o centro tecnolóxico Anfaco-Cecopesca culminaron 7 anos de investigación conxunta que deu lugar a un produto industrial innovador baseado en fotónica, que vén a revolucionar a maneira na que a industria alimentaria efectúa os controis de calidade e seguridade. Cunha achega pública de 1,15 millóns de euros e un investimento total de 3,8, o proxecto, denominado Future Food Factory, contou co apoio da Xunta de Galicia no marco do Programa Unidades Mixtas de Investigación.

A Comisión Europea seleccionou a fotónica avanzada como unhas das tecnoloxías clave para sectores como o da industria alimentaria. A implementación desta tecnoloxía, ademais de revolucionar o control de calidade e seguridade dos alimentos durante os procesos de fabricación, permite automatizar os procesos de inspección, reducir as diminucións de produto e as posibles incidencias. Ademais, grazas á automatización dos procesos, conséguese unha redución dos custos de consumo de enerxía. Todos estes factores converten esta tecnoloxía nunha panca clave para o avance cara á fabricación intelixente.

Concretamente, a través desta Unidade Mixta, que contou coa colaboración de 14 empresas, avanzouse no desenvolvemento de tecnoloxías con imaxe hiperespectral, que permiten a determinación cualitativa e cuantitativa da materia prima de forma rápida, en liña de proceso e en tempo real, cun elevado grao de precisión e de forma non invasiva, operando con todas as esixencias da industria manufactureira mar-alimentaria.

En concreto, traballouse sobre diferentes casos de uso, como a cuantificación de, entre outros, humidade, graxas, proteína, sal ou azucres, así como control de textura, detección de corpos estraños, volume de enchido, grao de cocción etc. Igualmente, permite realizar a clasificación da materia prima por cor, forma, tamaño…. Actualmente disponse de aplicacións para produtos pesqueiros, patacas, froitas, cereais, galletas, forraxe e mesmo, fóra do complexo alimentario, para madeira.

As Unidades Mixtas de Investigación son un instrumento de cooperación público-privada impulsado pola Xunta de Galicia para desenvolver conxuntamente actividades de I+D+i estratéxicas e garantir a transferencia de coñecemento ao tecido industrial. En total, desde a posta en marcha deste programa en 2014, a Xunta de Galicia apoiou 55 Unidades Mixtas de Investigación, coa participación de 39 empresas e 14 centros de coñecemento, e un investimento final mobilizado de case 155 millóns de euros.