Formato Verde, con sede no Polígono Industrial de San Cibrao das Viñas (Ourense), desempeña a súa actividade no sector do equipamento para a recollida de residuos urbanos desde o ano 2001. A súa filosofía baséase en dúas premisas clave. A primeira delas é que o contedor é o elemento polo que o cidadán xulga a todo o sistema de recollida e que, ademais, afecta á estética de toda a cidade. A segunda está claramente enfocada a contribuír, a través da súa achega ao mercado, na mellora das taxas de reciclaxe e facilitar o uso. “Cremos que debemos facer produtos estéticos, tratando ao contedor como mobiliario urbano. Ademais, debemos incorporar melloras que redunden en vantaxes para o cidadán”, explica Marcos R. Jorge, administrador.

Formato Verde ten unha longa lista de achegas ao mercado, moitas delas patentadas, e o desenvolvemento continuo para impulsar a súa competitividade é parte do día a día da empresa. “Achegamos ao mercado o concepto de contedor estético, o concepto de menor altura para reducir o impacto visual e o risco de atropelos, a solución de rapidez na descarga para reducir o tempo que pasa o camión na vía pública, reducindo así as molestias aos veciños en termos de afectación ao tráfico, ruído, emisións de CO2 ou consumo de combustible. Tamén o concepto de tapa lixeira, o de peche amortecido e posteriormente, tras a aparición da covid-19, a boca sen contacto”, enumera Marcos R. Jorge.

Formato Verde ten presenza en España e Portugal con empresa propia e noutras rexións como Francia, Países Bálticos e Europa do Leste a través de distribuidores.

A Coruña, Lugo, Xixón, Bilbao, Almería, Málaga, Marbella, Ibiza ou Oporto son exemplos de cidades nas que se poden ver os seus contedores.

Deseño ao servizo da innovación

Os contedores de residuos son un dos elementos de maior impacto visual dos núcleos poboacionais. Deseñar solucións estéticas que cumpran cos requisitos funcionais e os requisitos específicos do sistema de recollida é un reto ao que busca dar resposta Formato Verde e que implica o equilibrio de múltiples factores. “Un tende a menosprezar a complexidade dun contedor, pois asimílase a un cubo, a unha peza estática que non ten movemento. Con todo, a realidade é un pouco máis complexa, o que demostra o feito de que sexamos tan poucos fabricantes. Gran investimento en desenvolvemento, moldes e maquinaria constitúen as principais barreiras de entrada”, explica Marcos R. Jorge. “No noso caso, un contedor tipo, de carga lateral, constitúese de 81 pezas, que proveñen de 8 provedores diferentes, todos eles en Galicia. Os contedores deben ser compatibles en todos os seus movementos de apertura de tapas con diferentes marcas e modelos de camións de lixo, en paralelo deben cumprir unha serie de normas europeas que restrinxen as posibilidades de desenvolvemento en pos de asegurar a compatibilidade. Ademais, teñen que achegar algunha mellora funcional para o cidadán ou para a empresa de recollida, ser competitivos en prezo, apilables para que viaxen sen encarecer o produto, fáciles e baratos de manter…”, enumera.

Apoio do programa DeseñaPeme

Formato Verde foi unha das empresas beneficiarias da liña DeseñaPeme, impulsada pola Xunta de Galicia a través da Axencia Galega de Innovación. Concretamente, axudoulles a deseñar o City.Bin, un novo produto co que conseguiron integrar o deseño na estratexia, deseñando unha nova gama de contedores RSU de carga vertical para o mercado europeo. “Este é un produto disruptivo, novo no sector RSU, co que accedemos ao mercado francés e buscamos entrar no mercado europeo, xa que é un mercado onde predomina a carga vertical con contedores de superficie e soterrados”, explican desde a empresa. A familia de contedores City.Bin ofrece a posibilidade de que un mesmo produto teña a súa versión de superficie e soterrada, cunha estética amable onde se busca minimizar o impacto visual e así aumentar a seguridade viaria, sempre dentro da tendencia de humanizar as cidades. Ademais, foi deseñado tendo en conta as técnicas de ecodeseño e de redución da pegada de carbono, tendo como resultado un produto sustentable e 100% reciclable.

Entre os retos actuais de Formato Verde, atópase o de dar resposta ao chamado “pago por achega”, é dicir, que cada cidadán pague en función do lixo que produza. “Isto é un reto para todo o sector do que aínda estamos moi lonxe os fabricantes. No noso caso, estamos a desenvolver unha electrónica propia, que identifique o usuario, limite a cantidade de lixo por cada apertura, informe do nivel de enchido ao camión e calcule un roteiro optimizado, avise cando foi recollido ou cando se incendia... De novo, non será necesario só desenvolvelo, senón que sexa estable, fiable, amigable, competitivo en prezo, etc.” conclúe.