Con base en Vigo, Centum Research and Technology é unha das empresas con maior impacto no sector aeroespacial de Galicia. Con presenza en varios mercados internacionais, nos últimos 5 anos experimentaron un notable crecemento, tanto en persoal como en volume de facturación, reflectindo así o éxito dos seus produtos e servizos. Entre eles destaca Lifeseeker, un innovador sistema aeronáutico que sirve para localizar persoas desaparecidas.

Cal é a misión no mercado de Centum Research and Technology e en que áreas de coñecemento están especializados?

A misión de Centum Research and Technology é deseñar, desenvolver e comercializar sistemas aeronáuticos de misión nos ámbitos de emerxencia, seguridade, defensa e aeroespacial. A nosa visión é desenvolver sistemas altamente tecnolóxicos para plataformas aéreas tripuladas e non tripuladas que aporten un gran valor ao mundo.

As áreas de coñecemento nas que estamos especializados inclúen o procesado dixital do sinal, radio definido por software e radiocomunicacións. Centum especialízase en comunicacións móbiles. Utilizamos os últimos avances en tecnoloxías de comunicación para aumentar a eficiencia en misións críticas.

Ademais, temos un equipo de profesionais altamente cualificados que traballan en proxectos que resolven problemas reais e achegan un valor real á sociedade, como Lifeseeker.

En que consiste exactamente Lifeseeker e que permite?

Lifeseeker é un sistema aeronáutico de misión para busca e rescate (SAR), capaz de localizar con exactitude persoas desaparecidas a través dos seus teléfonos móbiles. Pode ser utilizado tanto en helicópteros como en drons.

Este dispositivo converte os teléfonos móbiles en balizas de emerxencia que permiten guiar rapidamente aos equipos de busca e rescate cara á localización exacta da persoa desaparecida. 

Desenvolvemos, fabricamos e comercializamos todos os nosos produtos desde a nosa oficina en Vigo.

En que mercados está implantado actualmente este innovador produto? Destacaría algún caso real de uso?

LifeSeeker está implantado en varios mercados internacionais, dirixido principalmente aos servizos de emerxencia, así como aos de seguridade e defensa que realizan tarefas de rescate. Recentemente, fixemos a nosa entrada nos mercados de Estados Unidos e Australia. Ademais, Suíza é un dos mercados clave que exploramos cando comezamos a nosa expansión en 2016.

Un caso recente de éxito tivo lugar precisamente en Suíza, onde Lifeseeker axudou aos servizos de emerxencia a localizar unha persoa ferida nos Alpes debido a un accidente de tráfico. O seu coche desviouse da estrada e caeu por un barranco. Grazas a Lifeseeker, a persoa puido ser localizada con vida.

Outro caso de éxito ocorreu en Alemaña, onde un home de 84 anos con Alzheimer se perdeu ao ir á compra. Levaba consigo un teléfono móbil, o que permitiu aos servizos de rescate localizalo en só dez minutos. Este é un claro exemplo do valor que Lifeseeker pode achegar en situacións de emerxencia.

Como valoran o potencial de crecemento no mercado deste produto a curto e medio prazo?

Temos expectativas moi positivas por varias razóns. En primeiro lugar, polo éxito que a nosa tecnoloxía está a acadar con clientes reais. Acumulamos centos de casos de éxito e só a semana pasada sumamos máis de 10 rescates con éxito.

 En segundo lugar, debido á proliferación dos drons, están a abrirse novas e significativas oportunidades de crecemento. Isto débese ao seu baixo custo e ao feito de que cada vez máis equipos de rescate están a incorporar drons nas súas operacións.

Na actualidade, operamos en catro continentes. No último ano, expandimos a nosa presenza a Oceanía e Asia. Estamos seguros de que a nosa tecnoloxía se converterá nun compoñente esencial para equipar drons e helicópteros. Grazas a Lifeseeker, a taxa de éxito en operacións de busca e rescate dos nosos clientes mellorou considerablemente, o que se traduce en máis vidas salvadas.

En que outros proxectos ou produtos están enfocados?

A “Celda de Comunicacións” é un produto en desenvolvemento que se enmarca dentro da Civil UAVs Iniciative en colaboración con Babcock. Este produto ten a capacidade de establecer unha rede de telefonía móbil privada en situacións de emerxencia, cando a cobertura normal se ve interrompida por desastres naturais. A celda proporciona unha solución efectiva cando as infraestruturas de comunicación fallan, creando unha rede que facilita as comunicacións entre os dispositivos conectados a ela.

Deseñado para restablecer as comunicacións en situacións críticas provocadas por desastres naturais como incendios ou inundacións, un dos seus principais atributos é a súa portabilidade. Pode integrarse en diversas plataformas, incluíndo drons.

Estamos a recibir unha resposta moi positiva no mercado por parte dos servizos de emerxencia.

Como valoran as oportunidades que ten a nosa Comunidade neste sector impulsadas polo Polo Aeroespacial de Galicia?

As oportunidades que nos ofrece o Polo Aeroespacial de Galicia son significativas e prometedoras. A combinación de innovación tecnolóxica, colaboración público-privada e un forte compromiso co desenvolvemento industrial sitúa a Galicia nunha posición privilexiada para liderar o crecemento no sector aeroespacial.