Krack naceu no ano 1990, cando Juan Carlos Fontán e o seu irmán Manuel decidiron abrir unha tenda de zapatos en Pontevedra baixo unha idea principal: poder ofrecer unha gran variedade de calzado nun só espazo. Pero o que comezou como unha zapatería física tradicional foi crecendo aos poucos, abríronse máis tendas en diferentes cidades de Galicia e o negocio foi dotándose dunha maior estrutura, tanto a nivel de persoal como de enfoque empresarial. Tras o éxito inicial e os bos resultados, en 2005 fíxose unha diversificación do negocio, adquirindo as franquías da firma italiana Geox e posteriormente da inglesa Clarks. Foi en 2012, cando Krack estaba presente xa nas principais cidades galegas e en varios puntos de España, cando deron o salto ao ecommerce, o que marcou, sen dúbida, un antes e un despois na traxectoria da compañía. “O que nos impulsou a facelo foi o mercado. O ecommerce empezaba a ser unha canle de vendas forte en España e queriamos que Krack estivese presente nel para poder chegar a máis clientes e poder dar servizo tamén nos sitios onde non estabamos presentes fisicamente”, explica Sebastián Troyas, responsable de márketing e comunicación.

En pouco máis de 30 anos desde a súa fundación, as cifras falan por si soas. En 2022 Krack facturou ao redor de 34 millóns de euros e ten un equipo de 256 persoas. Na actualidade contan con 62 tendas físicas en España e Andorra. En dixital, contan coa web de Krack en España, Alemaña, Portugal e Francia, unha web de Zapaterías Miniprecios en España e están presentes en 7 marketplaces diferentes como Amazon, Spartoo e Zalando, entre outros, cos que chegan ás principais cidades europeas.

Hoxe o ‘en liña’ representa entre un 13% e un 15% do total do seu negocio. Con todo, a clave do éxito na súa estratexia é a chamada omnicanalidade, ou dito doutro xeito, unificar e ofrecer unha experiencia coherente ao usuario que integre a compra física e a virtual, adaptándose aos seus hábitos de consumo. “As campañas de márketing son pensadas de forma omnicanal desde o inicio e, independentemente da idea, esta adáptase ás diferentes canles e formatos. En canto á estratexia comercial, grazas ao noso Shop & Go, un cliente desde calquera das nosas tendas ten acceso a todo o catálogo da compañía e pode mercar un produto e elixir entre recollelo na propia tenda onde o comprou, recibilo en casa ou mesmo noutra tenda”, explica Troyas.

En todo este armazón, a loxística e o transporte tamén son fundamentais “para asegurar que o produto estea canto antes nas nosas tendas e ao dispor dos nosos clientes en calquera canle de venda. A eficacia da nosa cadea de subministración depende dunha loxística e un transporte eficientes. Iso permítenos reducir custos, reducir tempos de entrega e optimizar o nivel de inventario nas nosas tendas e almacéns”, detalla.

Pioneiros en márketing

Xunto coa innovación e a dixitalización, outra das pancas de éxito foi a concepción da súa estratexia de márketing. “A filosofía de Krack é a de estar sempre probando cousas novas e sen prexuízos”, explica o seu responsable, Sebastián Troyas. “O orzamento co que traballamos é moi baixo, algo a priori negativo, pero que á súa vez é positivo, xa que nos fai desenvolver ao máximo a creatividade para xerar ideas low cost, buscar sinerxías e estratexias de baixo custo pero de altos resultados”.

De feito, en 2012, coincidindo coa apertura da súa tenda en liña, foron pioneiros na creación de coleccións cápsula con influencers. “Hoxe en día case todas as marcas teñen colaboracións deste tipo. No noso caso o que sempre buscamos é ofrecerlles proxectos diferentes, atractivos e buscar relacións a longo prazo. O exemplo perfecto é o de Dulceida, unha das influencers máis relevantes de Europa. Empezou a deseñar colecciones cápsula para Krack no 2013 e hoxe en día seguimos traballando xuntos e cada ano con mellores resultados”.

Unha aposta pola sustentabilidade

O compromiso coa sustentabilidade da compañía materialízase no proxecto Krack 360 co obxectivo de avanzar cara a unha xestión sustentable da empresa, centrándose nos tres piares fundamentais: persoas, planeta e desenvolvemento sustentable ou gobernanza.

En primeiro lugar, “buscamos mellorar o benestar das persoas que traballan na compañía, fomentando aspectos como a conciliación, a promoción interna e a formación continua. A nivel externo, colaboramos en diferentes iniciativas con asociacións e ONGs co obxectivo de axudar a reducir as desigualdades”, explica Troyas.

Na área ambiental, comezaron a investigar solucións innovadoras de reciclaxe de calzado e economía circular, un dos grandes retos que ten o sector na actualidade. Neste ámbito foron unha das empresas seleccionadas para formar parte do proxecto europeo de economía circular C-Voucher, no que participou a Xunta a través da Axencia Galega de Innovación. Tamén apoian a marcas emerxentes de impacto social positivo, incorporándoas á súa oferta. O terceiro piar de gobernanza é indispensable para reforzar a súa cultura corporativa e ética e estano traballando a través da creación dun código ético, que recompila os seus valores, responsabilidades e compromisos como empresa.

Na actualidade, tras lanzar un rebranding da marca, o seu principal reto é reforzar os seus valores e posicionamento, tanto interna como externamente, así como seguir crecendo e gañando cota de mercado, tanto en tendas físicas como no ecommerce.