Conservas A Rosaleira comezou a súa andaina en 1940 na comarca pontevedresa do Rosal da man de José Sánchez García. Inicialmente, esta aventura empresarial naceu da paixón pola agricultura e a educación, ensinando aos mozos o cultivo de hortalizas e froitas entón pouco comúns na rexión, como o tomate e a cabaciña. Co tempo, esta práctica agrícola transformouse nunha fábrica pioneira en conservas vexetais en Galicia, un próspero negocio que se foi adaptando aos tempos cambiantes. 

A empresa mantivo desde os seus inicios o compromiso do fundador coa calidade e a naturalidade dos seus produtos. Este compromiso viuse reforzado coa entrada de Terras Gauda na compañía en 2007, ampliando a capacidade financeira da conserveira e a expansión comercial. 

Conservas A Rosaleira destácase non só polo seus grelos de indicación xeográfica protexida de Galicia, que representan un 80% das súas vendas, senón tamén por unha diversa gama de produtos en conserva que abarcan desde tomates naturais e mirabeles en caldo de azucre ata fabas de Lourenzá e patacas, tamén coa distinción IXP pataca de Galicia. A adopción de prácticas agrícolas modernas e a colaboración con agricultores locais subliñan o seu compromiso coa sustentabilidade e a calidade, referendada polo selo Galicia Calidade.

Produtos bio para consumidores concienciados

A visión da empresa esténdese máis aló da tradición, abrazando a innovación coa introdución da súa nova liña de produtos bio e a expansión do seu catálogo para reducir a dependencia dun só cultivo. 

O enfoque en produtos libres de aditivos, reflectido mesmo nos seus procesos de produción manual, responde á crecente demanda dos consumidores por alimentos saudables e auténticos, que manteñen todo o seu sabor e propiedades naturais.

A innovación tamén se reflicte na colaboración con outras compañías clave da industria alimentaria galega, como Coren, coa que comercializan desde 2019 lacón con grelos en conserva, un prato cociñado con grelos A Rosaleira e patacas da variedade Kennebec e con porco alimentado con castañas galegas.

A estratexia actual de Conservas A Rosaleira evidencia un claro enfoque cara á expansión e o recoñecemento nos mercados nacionais e internacionais. Con vendas que roldan o millón de euros anuais, a empresa mantense firme na súa misión de levar o mellor de Galicia ás mesas dos padais menos conformistas e máis preocupados pola alimentación saudable e sustentable.

Conservas A Rosaleira soubo conxugar a tradición e a innovación sen perder de vista a súa esencia: a calidade e a autenticidade dos seus produtos. Nun mercado que cambia constantemente, Conservas A Rosaleira mantense como un símbolo de resiliencia e adaptabilidade.