O plan contempla dúas liñas, unha dirixida ás pemes, que abarca máis do 80% do orzamento total, e outra destinada a grandes empresas, co fin de que contribúan coa súa experiencia e envergadura a potenciar o efecto das misións como axente tractor. 

O 15 de marzo comezou o prazo para que as cámaras de comercio, como entidades colaboradoras adheridas ao convenio, solicitasen a inclusión das accións para realizar no calendario do programa. Unha vez realizadas as solicitudes, cada cámara poderá convocar e abrir a inscrición para que as empresas interesadas poidan participar.

Partindo da base de que cada empresa pode participar en máis dunha actuación, o obxectivo é alcanzar 500 participacións de pemes nas accións de promoción, mellorando a súa imaxe nos mercados internacionais e aumentando a diversidade e presenza global das empresas galegas no mundo. Todas as actuacións están dirixidas a facer crecer a base de empresas exportadoras, a fomentar e consolidar a presenza de empresas galegas nos mercados internacionais e a conseguir unha maior diversificación, tanto sectorial como xeográfica das exportacións galegas, ofrecendo un apoio financeiro que pode cubrir ata o 90% dos custos para as pemes e ata o 70% para as grandes empresas.

O programa prevé para esta convocatoria máis de 30 mercados prioritarios de acción comercial entre os que se sitúan China, India, Israel, Xapón, Reino Unido, Alemaña, Marrocos, Brasil, México, Emiratos Árabes, Estados Unidos ou Canadá, así como outros países para os que se xustifique a idoneidade do mercado para as empresas galegas.

Cun investimento de máis de 12 millóns de euros desde o ano 2014 para estas actividades, o Plan de Misións Comerciais logrou unha participación media anual de máis de 170 pemes, estendendo o seu alcance a 70 países diferentes. Este esforzo forma parte da Estratexia de Internacionalización do Goberno galego, a cal foi un factor determinante para que Galicia rexistrase un récord histórico en exportacións en 2023, superando os 30.000 millóns de euros.