Inversa naceu en 2017 froito das inquedanzas dos seus fundadores, Atilano Martínez, Ana Mª Belén Olmos e Berta Otero, profesionais cunha dilatada experiencia en finanzas, investimento e análise de riscos que impulsaron unha solución tecnolóxica para resolver dúas grandes dificultades que detectaban a miúdo: a das pemes para atopar financiamento e a dos pequenos investidores para conseguir rendibilidade polos seus aforros. 

“Desde marzo do 2019 estamos a operar no mercado español e somos o ‘Tinder financeiro’. A nosa plataforma crea a contorna favorable que facilita a conexión entre empresas e investidores coa intención de que se coñezan e, se xorde o amor, poidan iniciar unha relación onde ambas partes gañan: a empresa consegue unha vía de financiamento alternativo e complementario á banca e o investidor, unha rendibilidade máis xusta para os seus aforros”, explica Ana Mª Belén Olmos, unha das súas fundadoras.

Inversa Invoice Market , conectando facturas e investimento

Inversa ofrece unha plataforma para dar solución a clientes cada vez máis dixitais e hiperconectados. A través do chamado crowdfactoring, o seu obxectivo é democratizar as finanzas para calquera perfil investidor e apoiar o crecemento das pemes ao investir directamente na economía real. O crowdfactoring, tamén coñecido como invoice trading, é un tipo de financiamento alternativo onde as empresas anticipan a cobranza das facturas que emiten aos seus clientes a través das achegas de investidores particulares ou outras empresas que lles adiantan o diñeiro a cambio dunha rendibilidade, todo isto xestionado de forma telemática a través dunha plataforma dixital. Como exemplifica Olmos, “unha peme ofrece unha factura que vai cobrar a 30, 60 ou 90 días, e os investidores particulares achegan capital ata completar o importe da mesma. Os investidores obteñen unha rendibilidade, previamente fixada, dos seus cartos e as empresas o anticipo da súas facturas”.

Concretamente, en Inversa calquera persoa pode investir a partir de 20 euros, democratizando así o investimento e favorecendo a educación financeira. “Ademais, poñemos á súa disposición unha ferramenta que cariñosamente chamamos Ramón. Trátase dun asistente baseado en intelixencia artificial que axuda aos investidores a deseñar as súas propias estratexias en función dos seus obxectivos de rendibilidade e risco”, conta. 

Vocación internacional

O intenso traballo despregado polo equipo de Inversa tivo impacto na internacionalización da marca, que conta hoxe con investidores e clientes de toda Europa. “A plataforma deu entrada paralelamente en todo este tempo a facturas españolas, portuguesas, alemás, francesas, italianas, suízas... ata chinesas. Todas elas, con tipos de entre o 7 % e o 10 % anuais e vencementos non superiores a 180 días. En Inversa preto do 50% das facturas que publicamos na nosa plataforma correspóndense con facturas de pagadores internacionais, co que axudamos a moitas pemes a exportar dadas as dificultades que conleva xestionar estas cobranzas”, explica.

Pola parte das empresas, a súa carteira de clientes componse fundamentalmente de entidades españolas que traballan non só para empresas máis grandes dentro do territorio español senón que tamén exportan a diversos países dentro de fóra de Europa. Inversa ofrécelles unha fonte de financiamento alternativo cunha serie de vantaxes adicionais, como a axilidade, a flexibilidade ou a transparencia. Ademais, as posibilidades de financiamento son maiores ao conectar con múltiples investidores e o diñeiro recibido a través de o invoice trading non computa como débeda no CIRBE (Central de Riscos do Banco de España), polo que non penaliza outras vías de financiamento complementarias.

A día de hoxe, Inversa conta con máis de 1.500 investidores activos e unhas 200 pemes que usan a plataforma a diario. “A nosa plataforma apostou desde os seus comezos pola tecnoloxía a través de blockchain, big data, cloud computing, machine learning e intelixencia artificial para automatizar os procesos, o cal nos permitiu financiar xa máis de 3.600 facturas por un importe total de preto de 22 M€”, destaca. “Igualmente, identificámonos como unha plataforma de financiamento e investimento ética. A través do noso sistema de crowdfactoring, permitimos aos aforradores financiar as facturas das empresas en liña. Desta maneira, promovemos a economía real, e poñemos en valor aqueles proxectos que buscan transformar as súas comunidades e mellorar o mundo”, conclúe.

O principal reto de Inversa para os vindeiros anos é expansión a través da internacionalización cara o mercado europeo.