GESTÁN é un grupo empresarial galego especializado no desenvolvemento e implantación de solucións ambientais para as empresas, contribuíndo á súa sustentabilidade económica, social e ambiental. Ao longo das décadas, ampliaron e diversificaron a súa actividade ás áreas de residuos, auga e bioenerxía. 

O xerme do grupo GESTÁN, formado na actualidade por 6 empresas e máis dun centenar de empregados, está nunha pequena empresa familiar de recollida e transporte de residuos. Como foi o proceso de recoller a testemuña e liderar esta transformación?

Si, o meu pai tiña unha pequena empresa, Contenedores Pardo, formada por el mesmo como autónomo e 3 ou 4 persoas ao seu cargo. No seu momento, cando se achegaba á idade de xubilación, propúxonos ao meu irmán e a min entrar no incipiente negocio ambiental que estaba a nacer. El estaba convencido de que tiña gran proxección. Así foi como o meu irmán Luis, recentemente terminada a carreira, e eu mesma nos incorporamos ao proxecto que foi o xerme do que hoxe é o Grupo GESTÁN. 

O grupo como tal fundámolo en 2002. En 2016 demos o salto a unha nave industrial do polígono coruñés de Arteixo, sobre unha parcela de 3.700 metros cadrados, á que se engadiron, máis recentemente, 10.000 máis para aloxar un centro loxístico de contedores. O desenvolvemento das diferentes necesidades que se foron creando no sector ambiental, unido á innovación e á posta en marcha de novas liñas de negocio, permitiunos que hoxe contemos con 6 empresas e un persoal de 125 persoas. 
 
En que liñas de negocio principais se enfoca actualmente o grupo?

Estamos centrados especialmente no tratamento de residuos e produción de biocombustibles. Entre as nosas liñas principais están a valorización de residuos non perigosos (de construción e demolición; de madeira e voluminosos, como poden ser mobles e colchóns, por exemplo). 

No que se refire a biocombustibles, centramos a nosa actividade a través de Biomasa Forestal, unha fábrica situada nas Pontes dedicada a fabricar e comercializar pellets, tanto con fin enerxético como de leito hixiénico para mascotas, unha liña que introducimos hai poucos anos. 

Ao longo das últimas décadas, ampliaron e diversificaron a súa actividade apostando, entre outros sectores, pola bionerxía e os biocombustibles. Que oportunidades abre este sector para Galicia?

Hoxe parece claro que necesitamos un novo modelo que abandone progresivamente e de forma relativamente rápida o uso de combustibles fósiles. Non podemos seguir co grao de emisións de CO2 que expulsamos diariamente á atmosfera a nivel global. Por iso, cremos que o sector da bioenerxía e o dos biocombustibles, que xa tivo un importante crecemento, especialmente desde a pandemia, está chamado a crecer nas próximas décadas. E aí ábrense moitas posibilidades, tanto para achegar novas solucións á industria, como para a xeración de novo talento e, sen dúbida, un gran espazo para a innovación.

Que papel xogou a I+D+i na súa traxectoria para ser líderes e referentes en Galicia como empresa de servizos ambientais? En que teñen posto o foco innovador?

A innovación está moi presente nas distintas áreas, non só nos proxectos de amplo alcance, senón tamén en procesos de áreas como a de xestión de persoal, financeiro, loxística, entre outros, onde a mellora de procesos pode xogar un papel diferenciador. 

Para o 2024 contamos con dúas importantes liñas de traballo, ambas en colaboración con outros organismos, xa que consideramos que é o mellor modo de realizalas, xa que cada un pon o seu coñecemento no que é especialista e desa forma conséguense mellores obxectivos. 

Temos xa en marcha o proxecto Estrada, dirixido a investigar mecanismos para converter en novos materiais os residuos poliméricos complexos de alto impacto ambiental, como son os termoplásticos derivados de PVC e ABS e as gomas e cauchos procedentes de cintas transportadoras ao final da súa vida útil. E o Smart2Reduce, de investigación industrial en tecnoloxías dixitais busca mellorar a competitividade do sector de reciclaxe de RCD. A clave deste proxecto será a separación a través de tecnoloxías de visión artificial e fotónica avanzada.

É tamén a cofundadora de Cafés Lúa, unha recoñecida marca local dedicada ao mundo do café e que nada ten que ver coa actividade de GESTÁN. Que lle achegou como empresaria esta experiencia?

A experiencia de Cafés Lúa, un proxecto que empecei bastante nova, forxoume moito nos obstáculos que debes superar en calquera negocio. Esa resiliencia da que tanto se fala agora é un concepto que eu aprendín pronto, ao poñer en marcha Cafés Lúa, empresa que ademais se movía nun ámbito bastante masculinizado, onde tamén houbo que superar algunha que outra barreira.