Pola súa situación xeográfica e a súa personalidade atlántica, a comunidade galega é unha das rexións que conforman a denominada “España verde”. Valorada polas súas paisaxes e a súa gastronomía, Galicia foi pioneira en distinguirse como un destino seguro e de calidade durante a pandemia. Tal foi o seu éxito que pechou o ano 2021 situándose case 25 puntos por encima da media nacional en canto á recuperación turística e a tendencia parece consolidarse en 2022.

Segundo o Clúster Turismo de Galicia, a Semana Santa superou as expectativas do sector, alcanzando cifras de entre o 75% e o 90% de ocupación. Os datos están reforzados grazas á promoción do Camiño de Santiago, que rexistrou a chegada de 1.500 peregrinos diarios a Compostela, deixando ao seu paso un elevado índice de ocupación nos establecementos da ruta.

O turismo sostible pasou de ser unha tendencia a unha oportunidade de desenvolvemento, especialmente para a comunidade galega, que converteu o aproveitamento dos seus recursos nun modelo de respecto polo medio ambiente e a súa contorna social. Para a directora de Turismo de Galicia, Nava Castro, “a sustentabilidade, xunto á procura da excelencia, a innovación e a dixitalización son piares sobre os que se constrúe a recuperación do sector turístico autonómico”.

O momento da enogastronomía

Galicia recibirá 31,7 millóns de euros de fondos europeos para impulsar o segundo Plan Territorial 2022-2025, que identifica a enogastronomía como unha prioridade para o desenvolvemento turístico da comunidade.

En coherencia coa Estratexia de Sustentabilidade Turística en Destinos 2022 a nivel central, a Xunta considera prioritario incentivar os proxectos de enoturismo, así como fortalecer a cociña galega e “situar a Galicia como destino enogastronómico de primeiro nivel.” Isto traerá consigo un modelo turístico de maior calidade e máis sostible, á vez que axudará a desestacionalizar o sector e fortalecer o tecido socioeconómico nas zonas vitivinícolas.

O Plan Territorial de Enogastronomía súmase ao Plan Territorial do Litoral a través do cal a comunidade autónoma recibirá 29,3 millóns dos fondos europeos Next Generation para potenciar a costa e promover o turismo náutico.

Unha ruta sostible

O Camiño de Santiago é un dos principais motores turísticos da Comunidade. Segundo o Centro Internacional de Acollida do Peregrino, en 2021 malia as restricións de mobilidade, 178.900 peregrinos visitaron Galicia. Por tanto, non é de estrañar que as principais actuacións en materia de sustentabilidade viren ao redor da ruta Xacobea.

Neste contexto, o Clúster Turismo de Galicia destaca o papel de varias empresas asociadas que “apostan por dinamizar as rutas xacobeas, priorizando o coidado e o desenvolvemento da contorna”. Entre elas, a entidade subliña o éxito de iniciativas como #CaminoClean de Tee Travel, que fomenta a idea dun Camiño no que “deixar pegada sen deixar marca”. Así mesmo, son numerosas as empresas de aloxamento ou establecementos turísticos que fomentan o consumo responsable e de produtos locais, promovendo a actividade económica da zona e contribuíndo a fixar poboación nos ámbitos rurais, como é o caso de varios establecementos hostaleiros de Caldas de Reis.

No marco do Camiño de Santiago e a sustentabilidade tamén xorde a iniciativa intermunicipal Mar de Santiago, que recolle o roteiro marítimo fluvial desde Vilanova de Arousa ata a capital galega, pasando polas localidades de Valga, Catoira e Pontecesures. Esta actuación, baseada no percorrido que faría a barca que trasladou os restos do Apóstolo a Galicia, non só promociona os recursos patrimoniais, senón que dinamiza de maneira responsable a economía do territorio.

Termalismo galego

Ademais de contar cun patrimonio cultural e natural único, Galicia é a comunidade líder en oferta termal en España, con máis do 20% de balnearios e máis de 3.000 prazas hostaleiras.

A súa capacidade de desestacionalización e de articular produtos turísticos combinados, fan deste sector uno dos máis atractivos a nivel económico. Ademais de traballar en conxunto co turismo deportivo, enogastronómico ou de saúde, tamén se presenta como unha alternativa aos peregrinos para que estes poidan gozar dun descanso durante algunha das súas paradas no Camiño.

Transición verde

Para que a sustentabilidade turística estea garantida, debe existir un claro compromiso para reducir os impactos negativos da actividade a nivel ambiental, económico e social.

Todas as partes implicadas e interesadas deben traballar cunha visión de conxunto e ofrecer unha experiencia coherente, que ademais de satisfacer as necesidades dos visitantes, xere desenvolvemento territorial. É por iso que o Clúster Turismo de Galicia aposta pola creación de sinerxías entre o sector turístico, o produtivo, o comercio local, o sector agrícola ou a artesanía, entre outros. Galicia promove os proxectos de colaboración, especialmente aquelas iniciativas transformadoras, que recollan as peculiaridades de cada territorio, os fagan máis competitivos e permitan o avance cara á transición verde.