Segundo datos ofrecidos polo Clúster, a industria alimentaria galega xera un negocio de 10.000 millóns de euros e emprega a máis de 32.000 persoas na comunidade. Parece un bo motivo para investir en Galicia.

Sen dúbida, o sector alimentario é un dos sectores estratéxicos en Galicia, tanto pola súa dimensión como pola súa transcendencia económica e social. De feito, en 2018 xeraba un valor engadido bruto (VAB) duns 4.070 millóns de euros, o 7,2% do PIB e 103.000 postos de traballo, o 9,2% do emprego total. Ademais, a evolución do VAB reflicte unha maior capacidade de resistencia do sector alimentario durante as crises económicas. Esta capacidade é máis patente no comportamento da industria alimentaria, tanto en relación co conxunto da industria manufactureira como do total da economía. Por tanto, é un sector fundamental para o futuro de Galicia, un sector polo que apostar e investir.

Clusaga impulsa a transformación dixital no sector alimentario galego co apoio da Xunta a través do programa do Igape para proxectos de Industria 4.0, co que foi galardoado en 2021 por cuarto ano consecutivo. Como responden á dixitalización as pemes do sector?

A evolución que vemos ano a ano é que as pemes están cada vez máis implicadas nesta transformación. Hai que ter en conta que converterse nunha empresa dixital require cambios moito máis profundos que simplemente investir na última tecnoloxía. A transformación dixital é a transformación do negocio modernizando as áreas funcionais que conforman a empresa, os procesos, a estratexia, os modelos de negocio, as operacións, os produtos, o enfoque de márketing, os obxectivos… mediante a adopción de tecnoloxías dixitais. Isto permite acelerar as vendas, aumentar o crecemento do negocio e a rendibilidade. Por iso, en Clusaga incorporámolo á nosa estratexia fundamental para o período 2021-2025 como un eixo que recolle medidas específicas, co obxectivo de acelerar a transformación dixital do sector alimentario.

Outro dos obxectivos de Clusaga busca incorporar ás empresas da agrupación industrial na estratexia da economía circular e a bioeconomía para favorecer a transición cara a un sector máis sostible. Que resposta están a recibir nesta liña por parte do centenar de socios cos que contan?

Efectivamente, incorporamos á nosa estratexia para o período 2021-2025 un eixo orientado ao impulso da sustentabilidade e incorporación das empresas a esta transición verde. Para iso deseñamos un servizo específico que permite potenciar o deseño e a execución de plans de circularidade e sustentabilidade para os nosos asociados. A resposta é moi positiva, en canto hai unha alta demanda. Ademais, nesta área queremos visibilizar as boas prácticas dalgunhas das nosas empresas que sirvan de modelo para o resto, e impulsar a participación das pemes en iniciativas relacionadas coas estratexias de transición ecolóxica e economía circular.

Precisamente a transición enerxética é unha das grandes apostas dos fondos europeos de recuperación. Como pode o sector alimentario galego aproveitar as oportunidades dos Next Generation?

Next Generation EU é unha oportunidade única para saír máis fortes da pandemia, transformar o noso sector e crear oportunidades para a innovación e as transicións ecolóxica e dixital, que consideramos necesarias e urxentes para seguir sendo competitivos. Con esta finalidade planificamos xunto coa Xunta de Galicia o lanzamento dunha Oficina Técnica Next Generation, especializada para o sector alimentario galego, que busca precisamente canalizar a información de todas as oportunidades que se están xerando neste ámbito e responder as demandas das empresas identificando sinerxías, de forma que se faciliten e se deseñen proxectos agrupados de alto impacto que impulsen a transformación do sector.

Deste xeito, agrupando os recursos e as competencias dos principais axentes da cadea de valor dos alimentos e bebidas de Galicia, establecendo as bases de proxectos conxuntos e aproveitando o alto potencial do sector, poderemos conseguir ese impacto significativo.

A Lei de simplificación administrativa e de apoio á reactivación económica de Galicia responde á necesaria mobilización de fondos e axiliza a xestión e revisión de procedementos, ademais de favorecer a captación e retención de talento. Considera que contribuirá á implantación de novos proxectos e iniciativas empresariais na comunidade?

Por suposto, a simplificación administrativa é fundamental para poder eliminar barreiras á execución dos proxectos industriais do sector e á atracción de investimentos. Por tanto, todas as iniciativas que supoñan a axilización da xestión, actualización de procedementos e simplificación de trámites son necesarias para que non se poñan en risco proxectos ou investimentos que se consideren estratéxicos.