Costa naceu en 2014 froito da iniciativa de Dani Bembibre, licenciado en Belas Artes e con unha sólida traxectoria nos campos do deseño gráfico, o branding e a identidade corporativa; e o arquitecto, deseñador e director de arte David Silvosa. Tras colaborar ao longo das súas respectivas carreiras profesionais, viron que sumando a complementariedade do seu coñecemento nun proxecto común podían crecer e chegar a clientes máis grandes dunha maneira diferente e cunha visión máis ampla.

10 anos despois, son unha das empresas galegas de referencia na creación, xestión e desenvolvemento de marcas, cun catálogo de servizos que inclúe estratexia, branding, identidade corporativa, experiencia de marca, deseño de espazos ou desenvolvemento de packaging e de produto, entre outros.

Dicía o deseñador norteamericano Bob Gill que “o problema é o problema”. Esta cita, unha das favoritas de Bembibre e Silvosa, é a que mellor explica a súa filosofía de traballo. Á hora de encarar calquera proxecto, en Costa sempre comezan por definir cal é o problema. “O termo ‘deseño’ é moi amplo: deséñase desde un plan estratéxico ata unha caixa de zapatos. Como cremos que se debe afrontar? Expomos o deseño como unha ferramenta estratéxica que pode afectar a calquera parte dun negocio, empresa ou organización. Entendémolo como un proceso a través do cal se analiza a situación para detectar realmente cal é o problema e esa precisamente é unha das partes máis importantes do camiño. Logo virá a execución, pero esta sempre debe vir a posteriori”, explica Dani Bembibre. Un bo deseño non é, por tanto, unha solución decorativa, nin “unha caixa de pos máxicos” para facer algo máis bonito. “Esa concepción do deseño é intranscendente, máis difícil de rendibilizar e, basicamente, supón para as empresas tirar un diñeiro que non vai traer retorno”, remarca.

Grazas á súa metodoloxía, conseguiron que os clientes os vexan, cada vez máis, como un partner que os acompaña xa desde as etapas máis temperás dun proxecto, axudando a definir as mellores solucións. Ao longo da súa traxectoria acumularon centos de traballos e entre os seus clientes figuran algunhas das marcas máis grandes e relevantes de Galicia, con proxectos para Hijos de Rivera como Son Estrela Galicia ou o rebranding de Cervexas 1906; a identidade corporativa e a arquitectura de marcas da Xunta de Galicia; o restyling de Finsa; a identidade de Novafrigsa, a liña de vacún de Coren; ou o redeseño da imaxe corporativa e dos puntos de venda da cadea Cenor. En todos eles, o deseño foi crucial, cun impacto medible e palpable.

Premios Galicia de Innovación e Deseño

Na última edición dos Premios Galicia de Innovación e Deseño, convocados pola Xunta de Galicia a través da Axencia Galega de Innovación, o estudo Costa foi galardoado na categoría de empresas, que demostra a integración do deseño na súa estratexia como factor de innovación. 

“Estamos moi orgullosos. Son uns premios con poucas categorías e candidatos, a selección é moi exhaustiva e os requisitos que se esixen son moi altos. Ver que se nos recoñece e valora no noso ámbito, onde temos o noso mercado principal, é moi gratificante. Doutra banda, cremos que son uns premios moi necesarios porque poñen o deseño e a innovación no punto de mira das empresas, o cal é moi positivo porque sempre é o talón de Aquiles”, explica Bembibre.

En Costa teñen claro que o deseño integrado na estratexia empresarial supón unha mellora no rendemento de calquera negocio ou organización. “Non ofrece a solución definitiva porque, entre outras cousas, iso probablemente non exista, pero si supón iniciar un camiño no que sempre garantiremos a mellora. Por iso o deseño ten unha relación tan directa coa innovación. Non existe innovación sen deseño e non existe un deseño que achegue valor sen buscar a innovación”, puntualiza.

O Programa de Deseño para a Innovación e a Sustentabilidade 2024 – Diferenza, impulsado pola Xunta, contempla entre as súas prioridades dar visibilidade aos referentes do pasado e do presente para poñer en valor o papel do deseño galego como ferramenta de competitividade. “É innegable que o deseño para a innovación é e seguirá sendo un motor para o futuro. Ademais, en Galicia hai unha gran tradición histórica. A primeira fábrica con planta circular non está en California, senón en Cervo e é Sargadelos; temos unha chea de exemplos industriais no sur de Galicia coas conserveiras, como o caso de Massó; o caso paradigmático de Finsa, cun desenvolvemento tecnolóxico e empresarial brutal; ou Hijos de Rivera, que non deixa ser unha cervexeira independente e familiar que está a competir nun mercado con empresas que lle dobran e triplican o tamaño”, repasa.

De fronte ao futuro, en Costa buscan seguir enfocándose como consultora de deseño con visión estratéxica, transmitindo tamén esa concepción ao resto do sector. Ademais, “como aspiración, encantaríanos saír das nosas fronteiras e conseguir algún proxecto internacional”.