A análise intelixente do vídeo dispoñible nos drons, e en particular a aplicación de estratexias de intelixencia artificial, son especialmente adecuados para resolver algúns dos principais retos aos que se enfrontan as operacións aéreas sen tripulación. A detección de obstáculos para unha navegación máis autónoma ou as inspeccións e vixilancia automatizadas son aplicacións crave para o futuro dos servizos con drons, e nelas céntranse os primeiros produtos de Sense Aeronautics, a nova startup de Gradiant.

“Resulta moi satisfactorio participar nun proxecto como este e continuar avanzando para lanzar ao mercado tecnoloxía que mellora os servizos existentes”, explica Fernando Gago, CEO de Sense Aeronautics. “Trátase dunha spinoff con tecnoloxía propia, concibida para habilitar unha maior autonomía nas operacións aéreas e orientada desde o inicio a un mercado internacional moi prometedor”, continúa.

A infraestrutura foi inicialmente deseñada como un sistema (cámara e procesador) a bordo da aeronave pero a día de hoxe permite o servizo en tempo real na nube (sen hardware específico embarcado) para escenarios con conectividade garantida.

A tecnoloxía na que se basea Sense Aeronautics, e que herda do centro tecnolóxico Gradiant, foi recoñecida en 2020 polo Drone-vs-Bird Detection Challenge grazas ás elevadas e precisas capacidades para detectar e identificar drons e outros obxectos no espazo aéreo. 

Sense Aeronautics foi recentemente seleccionada entre 4500 candidaturas procedentes de 125 países de todo o mundo como unha das cen finalistas do South Summit Madrid 2023, un dos eventos máis importantes de España para a presentación de proxectos innovadores de compañías emerxentes.

Esta é a terceira spinoff de Gradiant, xunto con Antexia Technologies, baseada en tecnoloxía antidrón, e Alice Biometrics, lanzada en 2019 co obxectivo de desenvolver unha solución de verificación de identidade remota baseada en intelixencia artificial e de desenvolvemento propio. Tanto Sense Aeronautics como Alice Biometrics contaron co apoio do Programa Ignicia, impulsado pola Xunta de Galicia a través da Axencia Galega de Innovación, e a Fundación Barrié.