A loita contra o cambio climático e o Pacto Verde Europeo (European Green Deal), que pretende conseguir unha economía moderna, competitiva e eficiente no uso de recursos, propiciaron o auxe das fontes de enerxías renovables en diversos sectores.

A carreira pola descarbonización comezou, e fíxoo cun obxectivo claro para Europa, alcanzar a neutralidade climática en 2050 e reducir un 55% as emisións de CO2 en 2030. Fronte a isto, a procura activa de fontes de enerxías limpas en España acelerouse e Galicia preséntase como unha rexión clave no desenvolvemento eólico, non só polas súas condicións climáticas e xeográficas, senón tamén pola súa experiencia en proxectos consolidados.

Galicia, a segunda rexión en xeración de enerxía eólica

Conscientes da necesidade de avanzar na transición enerxética, o tecido empresarial galego continúa traballando no desenvolvemento de iniciativas sostibles. Non en balde, a comunidade autónoma é a segunda en España, tras Castilla y León, que máis electricidade xera con fontes limpas, alcanzando o 76% do seu mix enerxético.

Galicia tamén ocupa a segunda posición do país en canto a xeración de enerxía eólica, achegando o 18,2% sobre o total eólico nacional, segundo os datos do último informe de enerxías renovables da Rede Eléctrica de España (datos 2020). Unhas cifras que falan da importancia dun sector clave no novo sistema enerxético que, a medida que gaña presenza, reforza o seu compromiso coa sustentabilidade.

Un modelo con garantía para o sector

A urxencia por desenvolver proxectos de enerxías renovables, que velen polo cumprimento dos compromisos ambientais europeos, require da máxima colaboración entre as administracións públicas e o sector privado. É por iso que a Xunta de Galicia manifestou a través de diferentes iniciativas o seu firme compromiso coas enerxías verdes e a industria eólica. Neste sentido, o vicepresidente primeiro e conselleiro de Economía, Industria e Innovación, Francisco Conde, asegurou que “Galicia conta cun modelo garantista que vela pola seguridade xurídica dos proxectos e polo imprescindible respecto ambiental.”

A favor dunha maior transparencia, a Xunta de Galicia impulsou unha serie de ferramentas para achegar información aos concellos, á cidadanía e a todas as partes interesadas, entre os que cabe destacar a súa guía divulgativa. Ademais das reunións levadas a cabo nos diferentes municipios, tamén pon a disposición a Oficina de información a propietarios de terreos, a través da cal se dan a coñecer os métodos e criterios de valoración, así como a normativa que se aplica á hora de clasificar e cualificar o chan. De igual modo, as entidades promotoras que queiran impulsar un proxecto neste sector, poderán consultar o catálogo de parques eólicos dispoñible na Oficina Galicia Empresa.

Axenda Enerxética de Galicia 2030

Co obxectivo de fomentar unha economía baixa en carbono, baseada en fontes de enerxía máis limpas, e garantir unha mobilidade sostible, Galicia está a elaborar a Axenda Enerxética 2030.

A través deste plan, co que postula liderar a transición enerxética, perséguese potenciar a eficiencia en todos os sectores: público, industrial e doméstico.

Desta maneira e seguindo a folla de ruta que deseña a Xunta de Galicia, queda patente a aposta polo binomio industria-sustentabilidade e a consolidación da comunidade galega como unha das rexións máis verdes de Europa.