A capacidade de adaptarse a novas canles de venda e de innovar nun mercado altamente competitivo foi clave para que o sector conserveiro galego continúe liderando o mercado internacional.

Segundo a Asociación Nacional de Fabricantes de Conservas de Peixe (Anfaco-Cecopesca), Galicia é a comunidade autónoma con maior relevancia na actividade nacional “tanto polo número de empresas e exportacións, como polos postos de traballo creados”, xerando 13.200 empregos directos, dos cales o 66% corresponde a mulleres.

Neste contexto, e coa achega produtiva da industria conserveira galega, España mantense como o maior exportador de Europa e o segundo produtor a nivel mundial de preparacións e conservas de peixe e marisco.

Exportacións

O liderado de Galicia consolídase, e faino conseguindo en 2021 o 88% da facturación nacional e a elaboración de 330.429 toneladas, valoradas en máis de 1.650 millóns de euros. Destas cifras, as vendas internacionais, que aumentaron un 0,32% o seu valor, alcanzaron os 1.132 millóns de euros por 225.571 toneladas de conservas, das cales o 59% foron de túnidos.

Con presenza en 142 países, os principais mercados do sector concéntranse en Europa, especialmente en Italia, Francia, Portugal e Países Baixos.

Industria circular

Do mesmo xeito que outros sectores produtivos, o das conservas tamén aposta pola innovación e a sustentabilidade no seu modelo de desenvolvemento. Por este motivo, participa en proxectos como Conserval, unha iniciativa que Cetaqua promove desde 2019 en Galicia e o norte de Portugal para “impulsar a modernización da industria conserveira a través do aproveitamento dos residuos”.

O seu principal obxectivo consiste na valorización de subproductos a través da transformación das correntes sólidas e líquidas en ácidos graxos volátiles, aceites de peixe con elevado contido en Omega-3 ou en hidrolizados proteicos.

Para a Xunta de Galicia, Conserval é un claro exemplo de colaboración público-privada por contar coa participación de Anfaco-Cecopesca, a Asociación Nacional de Industrias de Conservas de Peixe e Portugal, as universidades do Porto e Santiago de Compostela e Feuga. Neste sentido pronunciouse a conselleira do Mar, Rosa Quintana, quen indicou que actuacións como esta “constitúen un referente na xestión das relacións empresa-universidade, na promoción e execución de proxectos colaborativos e na implantación da innovación empresarial”.

Plan Estratéxico

Co obxectivo de garantir un crecemento de negocio sostible, o Goberno galego traballa na elaboración do Plan estratéxico da conserva que indique o camiño para seguir ata 2030, nos ámbitos da produción e comercialización, a innovación e o medio ambiente.

Trátase dun plan aberto e realizado en colaboración con Anfaco-Cecopesca que incidirá na importancia de seguir potenciando a internacionalización do sector.

No seu compromiso por continuar fortalecendo a industria, a Administración autonómica puxo ao dispor do sector transformador 19 millóns de euros en axudas para mellorar as instalacións das pemes conserveiras, ás que se presentaron preto dun cento de solicitudes.