Tattoo Contract, dedicada á xestión integral de proxectos contract para hoteis, retailers, oficinas, grandes superficies comerciais, inmobles residenciais e espazos públicos, realiza tamén iniciativas no ámbito da creación e fabricación de materiais innovadores a partir de subprodutos da industria. 

A viaxe de Tattoo Contract comeza no ano 2010 na Coruña, por mor dunha crise que levou ao seu CEO, Pablo García-Bodaño López, a perder o seu traballo, o que lle impulsou a aproveitar a súa experiencia no sector como directivo do grupo Tecam e a súa ambición de democratizar o acceso ao contract creando esta empresa que hoxe é unha referencia no sector polo desenvolvemento de proxectos a nivel internacional.

Desde entón, a empresa experimentou un crecemento continuo, forxando unha sólida traxectoria no equipamento de espazos a medida. A súa dedicación e compromiso reuniron a un equipo transversal altamente cualificado, impulsando unha evolución constante, totalmente enfocada a día de hoxe na sustentabilidade e a economía circular. O que realmente lles diferencia dos seus competidores é a súa vocación internacional e o seu “ADN solucionador”, esa capacidade de ofrecer ao cliente un proxecto “chave en man” a través dun proceso de traballo flexible que se desenvolve en varias etapas.

Espíritu colaborativo 

Para o seu CEO, unha das claves do éxito de Tattoo é a de ter a flexibilidade de ser grande ou pequeno e para iso é fundamental establecer sinerxías cos mellores profesionais de cada ramo para poder recorrer a eles no caso de que o proxecto o requira e iso é o que denomina a “tribo Tattoo”.  “Nós facemos proxectos moi grandes, aínda que non somos moitos na empresa”, explica García-Bodaño, “o que facemos é unir sinerxías. Aínda que traballamos tamén con outros sitios de España e a nivel internacional, facémolo máis a miúdo con industriais entre Galicia e Oporto, do eixo atlántico, xa que a proximidade permítenos ofrecer esa calidade e ter unha capacidade de supervisión óptima”.

Esta flexibilidade permítelles contar cos profesionais máis cualificados de cada área: carpinterías especializadas, empresas de iluminación e enxeñería especializadas, empresas de mobiliario exterior, de novos materiais, etc. “Tattoo encárgase de conseguir o proxecto no lugar que sexa e de darlle sentido común e aterralo”, xa que como indica García-Bodaño, “ao final todos os proxectos son aspiracionais e aínda que os renders aguantan todo, hai que aplicar o sentido e axustalo a un orzamento. Para iso hai que saber moito de materiais e dar alternativas, por iso é fundamental o traballo en equipo”.

Proxectos destacados

Tattoo Contract non sería o que é hoxe se non fose por aqueles proxectos que sen dúbida marcaron un antes e un despois ao longo da súa traxectoria, como o Hotel Sheraton de Doha (Qatar), todo un emblema na cidade e un proxecto que pasou de ser un orzamento dunha mesa e unha cadeira ao dun hotel de 400 habitacións, ou os teitos do metro na mesma cidade, un espectacular proxecto para o que competiron con diversas multinacionais, consistente en solucións de fibra de carbono que desenvolveron con industriais galegos que traballaban o composite.

Tamén foron responsables do equipamento de seis estacións de tren en Arabia Saudita, no medio do deserto, “reportounos moita aprendizaxe sobre todo en canto a loxística, xa que trasladamos todo desde aquí”, explica o CEO.

Outro proxecto tamén crucial para Tattoo desenvolveuse na República Dominicana, para a cadea hostaleira española Lopesan, cun orzamento de 9 millóns de dólares que tiveron que executar nun prazo récord de 6 meses desde que obtiveron os renders e que incluía todo tipo de espazos: casino, spa, restaurantes temáticos, discotecas, etc. En palabras de García-Bodaño, “é a mostra desa capacidade resolutiva que temos para dar resposta ás necesidades do cliente, somos un aparello dixestivo moi grande, somos moi polivalentes”.

Compromiso coa sustentabilidade 

A contribución de Tattoo Contract ao tándem deseño-innovación-sustentabilidade materialízase fundamentalmente en dúas iniciativas: o MIH (Material Innovation Hub) e WIM Studio.

O MIH consiste nunha librería e consultoría especializada en materiais, sustentabilidade e deseño circular, impulsada xunto á deseñadora Noemí Cortizas para apoiar a empresas e deseñadores na realización de conceptos de produtos e servizos, poñendo á súa disposición un exclusivo catálogo de materiais innovadores propios, fabricados a partir de subproductos de materiais orgánicos e inorgánicos, fomentando a economía circular e o I+D+i para alcanzar os estándares máis altos de eficiencia, resistencia e durabilidade.

O que para a maioría pode parecer un refugallo, para WIM Studio constitúe a materia prima perfecta para crear solucións personalizadas de equipamento de espazos, factor indispensable na transformación do interiorismo e a arquitectura cara a un futuro totalmente respectuoso co medioambiente. En WIM Studio reciclan e innovan para reducir residuos e diminuír a dependencia de materiais non renovables, dando lugar á creación de pezas innovadoras e resistentes que marcan a diferenza. Trátase, en definitiva, dun taller dedicado á creación de prototipos para darlle unha segunda vida aos residuos convertendo deste xeito un problema nunha oportunidade. A fabricación de novos materiais e solucións a partir de subproductos de varias industrias, baseándose na economía circular e utilizando a reciclaxe e a innovación para crear pezas únicas e personalizadas son a súa razón de ser.

Ademais, colaboran con compañías como Ilunion para darlle unha segunda vida aos residuos téxtiles do grupo en forma de equipamento e mobiliario nas súas distintas empresas e coa plataforma Universo Driada Vida, que axuda a xerar riqueza no medio rural, enfocando a investigación e a innovación á preservación do medio ambiente.

A curto prazo, Tattoo Contract aspira a consolidarse en Madrid cos espazos expositivos dos que xa dispón, pero sobre todo en impulsar este novo proxecto enmarcado no ámbito da sustentabilidade, que complementa a Tattoo e do que Pablo tamén é CEO.