Con sede en Salceda de Caselas, Granitos do Louro (Granilouro) é unha empresa familiar especializada na extracción, importación, transformación, colocación e comercialización do granito. Na actualidade, conta cun persoal de 60 traballadores e catro grandes naves industriais, nas que conta coa última tecnoloxía en maquinaria de corte e acabado, e nas que os mestres canteiros dan vida á pedra natural. 

Lastras, baldosas, bordos, bancos, fontes, escaleiras, fachadas ou xardineiras son algunhas das múltiples aplicacións que realizan para todo tipo de proxectos de edificación, paisaxismo, urbanización ou espazos públicos. 

A remodelación da Porta do Sol de Madrid e a pavimentación duns 40.000 metros cadrados da travesía que conecta o Arco do Triunfo cos Campos Elíseos, en París, son dúas das obras máis emblemáticas que Granitos de Louro acometeu na súa extensa carteira dentro e fóra de España ao longo de máis de 35 anos.

Apoio de InnovaPeme

Grazas ao apoio de InnovaPeme, o programa impulsado pola Xunta a través da Axencia Galega de Innovación, Granilouro deu un paso importante no campo da innovación e o desenvolvemento, logrando superar os tamaños convencionais das pezas de granito e abrindo novas posibilidades no sector da construción e do deseño urbano. 

O sector da construción sempre utilizou o granito debido á súa gran durabilidade e beleza atemporal. Con todo, sempre existiron restricións construtivas co granito debido ás limitacións dimensionais orixinadas polos estándares dos bloques comercializados que tipicamente presentan as seguintes dimensións: 300x200x150 centímetros. Este tamaño dificulta a creación de estruturas con grandes luces, polo que se orixinou un desafío que requiría dunha solución innovadora. 

O desafío pola obtención de pezas con maiores prestacións técnicas inspirou ao equipo de expertos de Granilouro a buscar unha solución innovadora e romper as barreiras impostas polas dimensións convencionais. A solución construtiva desenvolvida posibilita a creación de modelos de produtos superiores aos traballados habitualmente e xerará unha reevaluación dos métodos tradicionais de produción de pezas de granito. 

“Estamos orgullosos de anunciar que desenvolvemos con éxito unha nova solución técnica que permite elaborar pezas de granito con maiores prestacións construtivas. Os novos produtos desenvolvidos permiten estruturas de luces de máis de 10 metros. Esta solución non só expande as posibilidades de deseño e construción na industria do granito, senón que tamén ten un impacto positivo nas nosas comunidades ao proporcionar opcións de mobiliario urbano máis funcionais e atractivas”, explican desde a empresa. 

Este avance nas pezas de granito marca un fito significativo na industria. “Estamos comprometidos a seguir innovando e colaborando coa Axencia Galega de Innovación para desenvolver solucións que transformen o noso sector e melloren a calidade de vida nas nosas comunidades”, conclúen.