Pasek Minerais extrae dunita (silicato de magnesio) desde 1972 nunha explotación ao descuberto situada en Landoi (Cariño), na zona do Complexo Xeolóxico de Cabo Ortegal.

A empresa, que xera máis dunha vintena de traballos directos e outros tantos indirectos, conta cunha capacidade anual de extracción dunhas 700.000 toneladas de mineral. Tras a extracción, o mineral móese e clasifícase na planta para ser despois embarcado a clientes de todo o mundo a través dos portos de Cariño e Ferrol. 

“Aproximadamente, o 95% expórtase a granel cara a diferentes países de Europa, entre eles Francia, Alemaña ou Polonia”, explica Juan José Álvarez Rueda, director de Pasek Minerais. O 5% restante expórtase empaquetado, chegando a diferentes países de Sudamérica, así como EEUU, Arabia, Indonesia ou Vietnam. 

A dunita é un dos materiais fundentes clave para a industria siderúrxica, sector para que o traballan principalmente na actualidade, utilizada habitualmente como aditivo en fornos altos, para o recheo das piqueras dos fornos eléctricos ou como compoñente minoritario dos refractarios básicos utilizados en contacto co aceiro fundido.

Premios Galicia Innovación e Deseño

Os premios Galicia de Innovación e Deseño, impulsados pola Xunta de Galicia a través da Axencia Galega de Innovación, recoñecen ano tras ano o labor das empresas galegas como xeradoras de valor e calidade de vida a través da innovación, o desenvolvemento e o deseño.

Na última edición, Pasek Minerais foi a compañía galardoada co premio innovación na categoría Gran Empresa. “Este premio foi un recoñecemento ao intensivo labor de I+D+i que potenciamos nos últimos anos en busca de novas aplicacións e sectores para a dunita”, explica Álvarez Rueda.

De feito, a empresa ten en marcha dous proxectos de economía circular para o reaproveitameto dos seus estériles de lavado ultrafinos, catalogados na Materioteca de Galicia: o primeiro centrado en proxectos de absorción de CO2 e o segundo, na fabricación de lastre para a eólica mariña.

Sustentabilidade do sector mineiro

A sustentabilidade do proxecto mineiro de Pasek é unha constante nas políticas da empresa. “Para nós, que os nosos produtos sexan o máis sustentables posible e deixen a menor pegada de carbono é fundamental”, explica Juan José Álvarez Rueda. De feito, Pasek acaba de investir 400.000 euros para poñer en marcha unha planta solar para autoabastecerse, co obxectivo de alcanzar un mínimo dun 25% de media anual de autoabastecimento enerxético. E, de cara ao futuro, a súa idea é chegar a poder devolver parte desa enerxía a instalacións de uso público do pobo de Landoi.

Tamén contan con investimentos permanentes para a eliminación de ruídos e pos molestos para a contorna. Ademais, desde practicamente o comezo da explotación, contan cun plan de restauración continuo para garantir a máxima integración paisaxística da explotación.

“Se a todo isto lle sumamos a propia capacidade de captación de CO2 que ten a dunita de forma natural e que estamos a investigar ou a aposta que faremos por reducir a pegada de carbono na parte de transporte e loxística con hidróxeno verde, a idea nos próximos anos é lograr que finalmente os nosos produtos sexan cero emisións”, conclúe.