Desde o seu lanzamento en 2022, o Mapa de Capacidades Dixitais de Galicia, liderado polo centro GaiásTech da Axencia para a Modernización Tecnolóxica de Galicia, serviu como guía a empresas, organizacións e profesionais, fomentando a súa colaboración e o intercambio de coñecemento, ademais de contribuír ao posicionamento da comunidade no mapa tecnolóxico mundial.

A recente publicación deste directorio en formato aberto o pasado mes de marzo no portal Open Data da Xunta, ademais de facilitar aínda máis o acceso á información, fai posible a reutilización e a análise de todos eses datos, abrindo novas vías para a investigación e o desenvolvemento tecnolóxico, fomentando o crecemento e abrindo a porta tanto a startups como empresas consolidadas a contribuír ao tecido tecnolóxico de Galicia. Con esta decisión, GaiásTech suma un novo servizo ao seu intenso compromiso co impulso á transformación dixital do tecido produtivo galego.

O Mapa de Capacidades Dixitais creceu exponencialmente desde o seu nacemento, agregando valor e visibilidade ás competencias dixitais locais e converténdose nunha ferramenta vital para a visibilidade e o desenvolvemento do ecosistema tecnolóxico galego. Con 350 entidades rexistradas e información detallada de máis de 1.400 produtos e servizos e 78 tecnoloxías disruptivas na actualidade, este directorio configúrase como moito máis que unha base de datos, actuando como punto de encontro para a innovación.

A iniciativa non só facilita a interacción entre diferentes actores do sector tecnolóxico, senón que tamén promove a colaboración e o intercambio de coñecementos. Destacando as áreas de especialización e os servizos ofrecidos polas entidades rexistradas, o mapa permite a calquera empresa atopar o socio estratéxico perfecto, impulsar proxectos conxuntos e explorar novas oportunidades de negocio en ámbitos como a intelixencia artificial, o blockchain e a robótica, entre outros.

O Mapa de Capacidades Dixitais de Galicia tamén xoga un papel crucial na atracción de talento e investimento á comunidade. Ao ofrecer unha visión clara e detallada do ecosistema TIC, posiciónase como un recurso indispensable para aqueles que buscan mergullarse nun ambiente tecnolóxico cambiante e colaborativo. Ademais, a plataforma serve como un escaparate para o talento local, destacando a Galicia non só como un lugar de orixe de tecnoloxías disruptivas senón tamén como un destino atractivo para profesionais e empresas tecnolóxicas de todo o mundo.

A plataforma actúa como catalizador para a transformación dixital e o desenvolvemento tecnolóxico na rexión, evidenciando como a colaboración, a transparencia e o acceso aberto á información axudan a impulsar a innovación e fortalecer o tecido económico e social de Galicia.

Con cada entidade que se suma, o mapa enriquécese, ofrecendo unha imaxe cada vez máis completa e dinámica do ecosistema TIC galego. É unha invitación aberta a descubrir, colaborar e crecer xuntos na era dixital, subliñando a posición de Galicia como un hub tecnolóxico de relevancia non só a nivel nacional senón tamén internacional, un espazo no que se incentiva a colaboración, conectando empresas e profesionais co fin de explorar novas oportunidades e desafíos no camiño cara á transformación dixital.

O eixo transversal da Estratexia Galicia Dixital 2030 incide, precisamente, na especialización tecnolóxica desta Comunidade a través da promoción dun sector TIC adaptado ás necesidades e particularidades do territorio e da creación, atracción e retención de talento dixital. Galicia contribúe desta maneira ao obxectivo de soberanía dixital europea, na vangarda do desenvolvemento de tecnoloxías como a intelixencia artificial, o internet das cousas, a ciberseguridade etc.

Centro GaiásTech

O Centro GaiásTech, situado na cidade da Cultura, ten como obxectivo contribuír á transformación dixital do tecido produtivo galego favorecendo a xeración de produtos, solucións e servizos cunha pegada tecnolóxica, que proporcionen maior valor, innovación e competitividade nun ámbito global. A través de distintos servizos e actividades, o GaiásTech móstralles ás empresas a importancia de impulsar o talento dixital e a especialización tecnolóxica.