Detegasa conta cunha longa traxectoria no deseño e fabricación de equipos para o sector naval a nivel mundial. Cun equipo de enxeñeiros altamente cualificados e un enfoque centrado na sustentabilidade, Detegasa posicionouse como un referente no seu campo, destacando desde a súa fundación no ano 1965 non só pola calidade dos seus produtos, senón tamén pola excelencia técnica e o seu compromiso coa innovación. 

Na actualidade, Detegasa atópase centrada nun proxecto que consiste no desenvolvemento de tecnoloxía avanzada para unha nova forma de tratamento dos residuos sólidos xerados a bordo dos buques, que se basea na descomposición molecular debido á fricción con altas temperaturas e ao mesmo tempo deshidratación do propio residuo nun proceso que é medioambientalmente amigable e sustentable. Trátase dun sistema integrado de xestión de residuos que combina varias tecnoloxías entre as que se inclúen a separación, a compactación e o tratamento para poder proporcionar unha solución completa e eficiente.

Esta solución técnica que ofrece Detegasa destaca pola súa capacidade para adaptarse ás necesidades específicas de cada tipo de buque, desde cruceiros ata cargueiros, xa que o sistema ten a posibilidade de ser personalizado para poder satisfacer os requisitos de espazo, capacidade ou tipo de residuos de cada embarcación. Esta versatilidade convértea nunha opción atractiva para unha ampla gama de clientes na industria marítima.

Ademais do seu impacto ambiental positivo, a tecnoloxía desenvolvida por Detegasa tamén implica significativos beneficios económicos e operativos. Ao reducir a necesidade de realizar as descargas no mar, o sistema axuda aos armadores e operadores de buques a cumprir coas regulacións ambientais internacionais máis estritas, evitando posibles multas e sancións. Optimizando a xestión de residuos a bordo, mellórase tamén a eficiencia operativa, reducindo en consecuencia todo tipo de custos asociados.

O desenvolvemento desta innovadora solución foi posible grazas ao apoio do programa DeseñaPeme que a Xunta pon ao dispor das empresas galegas, unha iniciativa orientada a fomentar a innovación e o desenvolvemento empresarial na comunidade, que implica o financiamento de actividades de deseño, para a mellora das capacidades de innovación e sustentabilidade das empresas en Galicia, a través do impulso da xestión do deseño estratéxico de produtos, servizos e marcas e identidades corporativas.