A dixitalización das pemes non responde a unha moda, senón que ten que ver coas necesidades das pequenas e medianas empresas de seguir adiante con éxito na era dixital. O termo dixitalización aplicado a unha peme relaciónase coa aplicación das novas tecnoloxías, de xeito que lle permite multiplicar de maneira exponencial as interaccións cos clientes e optimizar os procesos internos. A súa implantación vai desde a creación dunha páxina web que dea a coñecer a empresa, á presenza nas redes sociais, ou ao establecemento de canles de venda ou, incluso, á automatización dos procesos internos.

A Xunta de Galicia, a través do Instituto Galego de Promoción Económica (Igape), participa de xeito activo na dixitalización das pemes mediante diferentes liñas de axudas que as acompañan neste proceso.

Programa ReAcciona

O programa ReAcciona (https://reacciona.igape.es) é unha iniciativa conxunta de Igape, Amtega e Gain, que comprende un esquema de servizos de mellora da competitividade empresarial. Nace para capacitar as pemes ante os novos retos do mercado, dotándoas dun valor engadido que permita acelerar os seus procesos de mellora e incorporar novos coñecementos ás súas estruturas. Trátase de servizos modulares desenvolvidos por consultoras seleccionadas mediante un proceso aberto de contratación.

O programa dispón dun total de 15 servizos ao redor de catro eixes de competitividade: a estratexia, a profesionalización, a dixitalización e a innovación, que se cofinancian resultando nunha axuda de entre o 70 % e o 80 % do valor do servizo.

 En particular, dentro do eixe de dixitalización, préstanse os seguintes servizos:

1. Definición dunha estratexia dixital da empresa, co obxectivo de coñecer o seu nivel de dixitalización e trazar o camiño cara á súa implantación.
2. Definición e implantación dunha estratexia de ciberseguridade para a peme, co obxectivo de coñecer o nivel de exposición ante riscos cibernéticos, tomar as medidas urxentes de protección e definir unha estratexia de ciberseguridade personalizada a medio e longo prazo.
3. Apoio na adopción de solucións de xestión empresarial en mobilidade, co obxectivo de deseñar o plan operativo de implantación das solucións dixitais innovadoras que se determinen prioritarias para a xestión empresarial en mobilidade.
4. Deseño dunha estratexia de márketing de contidos para a peme, co obxectivo de atraer e captar tráfico e vendas á web; converter e coñecer os seus visitantes; vender e optimizar os ratios de conversión e fidelizar, convertendo os seus clientes en subscritores.

No ano 2022, un total de 103 pemes beneficiáronse destas axudas mobilizando unha contía de máis de 471.000 euros.

Existe ademais a liña de axudas de dixitalización Industria 4.0, cuxo obxectivo é impulsar a transformación dixital das empresas mediante a implementación de tecnoloxías da información: intelixencia artificial, interconexión e xestión de procesos. Isto articúlase a través de axudas para apoiar o investimento en tecnoloxía e o asesoramento necesario para a súa activación.

Os proxectos poderán ser de dúas modalidades: proxectos colectivos ou individuais. Nos colectivos, un grupo de empresas (opcionalmente coordinadas por un organismo intermedio colaborador) aborda unha das seguintes tipoloxías de proxecto:

1. Propoñen utilizar e implantar un determinado sistema nas súas interaccións dixitais.
2. Propoñen a implantación dun sistema de dixitalización dalgún proceso ou de xestión integral especificamente deseñado ou desenvolvido para o seu ámbito de actividade.

Nos proxectos individuais, a peme pode abordar ata tres proxectos diferentes:

• O desenvolvemento dunha interface dixital para as súas interaccións de negocio ou a adopción/implantación dunha solución de interacción xa existente cos seus clientes ou provedores.
• A implantación de sistemas de intelixencia artificial, aprendizaxe automática e toma de decisións autónomas, interconexión de elementos físicos e virtuais, tratamento de datos captados (intelixencia de negocio, bigdata e similares) e ciberseguridade.
• A implementación de sistemas encamiñados á dixitalización de procesos concretos ou de xestión integral (ERP, CRM e similares).

Desde a súa posta en marcha no ano 2012, leva apoiado máis de 2.900 proxectos cunha mobilización de 15,5 M€.