A dixitalización e o control efectivo do inventario permite ás empresas gañar en eficiencia e competitividade. A finais de 2019, Ángel Hernández, Santiago Álvarez e Francisco Robredo uníronse para desenvolver unha solución neste ámbito. Naceu así Kiwanda Labs, unha compañía orientada a “ofrecer solucións para dixitalizar inventarios, optimizar procesos de loxística, proporcionar unha rastrexabilidade real na cadea de subministración e ofrecer unha solución para o mantemento preventivo e correctivo dos activos das empresas”, explica Francisco Robredo, CEO do proxecto.

Os tres socios contaban cunha sólida traxectoria profesional en sectores punteiros como a automoción e o téxtil, coñecían de primeira man as vantaxes de tecnoloxías como o SGA (software de xestión de almacéns) ou RFID (que consiste na utilización de etiquetas intelixentes que permiten a lectura e interacción con elas a distancia, cun máximo 20 metros) e buscaban democratizar o seu uso a un prezo alcanzable tamén para pequenas e medianas empresas.

Kiwanda soluciona así os problemas de inventario en empresas de sectores como a alimentación-industria, a loxística e o retail, contando xa con experiencias exitosas en compañías de referencia, como Kiwi Atlántico ou Bayer. Os beneficios que achegan aos seus clientes son múltiples, tanto en termos de optimización e eficiencia, ligado a un aforro de custos directos (menos diminucións, posibilidade de manexar máis inventario con menos recursos, maior rotación de stock e optimización de almacéns…) como en termos de mellor servizo ao consumidor, evitando erros e sendo máis áxiles con menor impacto ambiental.

Impulso da Business Factory Food

En febreiro de 2020 Kiwanda foi unha das empresas seleccionadas pola Business Factory Food, impulsada pola Xunta e dinamizada polo Clúster Alimentario de Galicia. Grazas ao seu paso pola aceleradora, e mentorizados por Kiwi Atlántico, puideron desenvolver unha solución única para o sector hortofrutícola que permite unha rastrexabilidade total desde o campo ata o cliente, ofrecendo tamén vantaxes para mellorar e optimizar operacións internas da cooperativa. “A nosa solución permite ter un control total da cooperativa, desde as características dos produtos que entran en cada palot, como peso, orixe, variedade…”, explica Francisco Robredo. “Ademais, permite controlar outros aspectos, como os tempos de maduración dos kiwis nas cámaras, emitindo alertas automatizadas cando alcanzan o seu punto óptimo para ser servidos”, continúa. Deste xeito, Kiwanda permite un control total sobre o produto para reducir notablemente as diminucións e garantir a consistencia de calidade entre lotes.

“O paso pola BFFood veunos moi ben porque foi xusto cando comezabamos. Permitiunos ter unha relación directa con empresas alimentarias a través do Clúster, participar en numerosos eventos e axudounos en termos de posicionamento e difusión comercial”, detalla Robredo.

Desde a súa posta en marcha, acumularon outros múltiples casos de éxito. No sector retail implementaron para a firma de moda coruñesa The Campamento unha solución RFID para a recepción de mercadorías, dixitalización do inventario en tempo real, picking e operacións loxísticas para simplificar e axilizar os pedidos.

Tamén puxeron o foco na xestión dos activos tanxibles (mobiliario, computadores, maquinaria), implantado un ambicioso proxecto en Bayer, onde todo o inmobilizado da multinacional alemá é xestionado grazas á súa plataforma.

O uso da tecnoloxía RFID neste caso resolve con eficiencia os procesos de inventario, localización, uso e coñecemento da vida útil ou mantemento de cada ítem, automatizando este proceso. “Por exemplo, se todos os microscopios teñen que ser calibrados cada 3 semanas, van saltando alertas para que a persoa asignada a levar todo ese mantemento proceda a realizalo”, explica Robredo.

Cun equipo de 9 persoas, actualmente e co apoio do programa Galicia Avanza, impulsado pola Xunta e Tecnópole, en Kiwanda están a traballar en abrir novos mercados con partners en Reino Unido e Alemaña, afianzando así o seu modelo de negocio. Tras o éxito de Bayer, o seu principal foco é o produto de xestión de activos. “Este produto serve para levar o mantemento preventivo e preditivo dos activos dunha compañía dunha forma sinxela e non intrusiva, alongando a vida útil dos mesmos. Permite a xestión documental dos activos, podendo asociar todos os documentos de cada un dos activos na plataforma; levar o mantemento con persoal interno ou externo; e o control de localización por RFID”, remarca.