Fernando Soto é un profesional galego con máis de 30 anos de experiencia no campo da dirección financeira e a consultoría e asesoría de pemes e novos emprendedores. Participa en diferentes programas de mentoring como “Youth Business Spain” da man da Fundación Ronsel; ou Turislab, a aceleradora de proxectos turísticos da Xunta de Galicia.

En 2022 foi nomeado, entre máis de 2.000 candidatos, Mentor do Ano 2022 de Youth Business Spain polo seu compromiso e labor altruísta compartindo a súa ampla experiencia cos novos emprendedores.

Á hora de comezar un proxecto empresarial, cales diría que son os primeiros pasos a nivel financeiro que debe ter en conta un emprendedor? 

Hai moito traballo que facer antes de empezar un proxecto empresarial: quizais é o momento de máis traballo. En primeiro lugar, hai que saber quen é o teu cliente, coñecelo a fondo, saber os seus gustos e as súas necesidades, para poder vender o teu produto ou servizo. 

Debes saber por que che van a comprar a ti e non á túa competencia. É a túa proposta de valor suficientemente atractiva? Por outra banda, hai que coñecer á túa competencia, os seus datos, como vende e como o fai e comparalo co teu proxecto. E, finalmente, o proxecto ha de ser viable, económica e financeiramente. 

Cales son os desafíos financeiros máis comúns que enfrontan os mozos emprendedores ao iniciar un proxecto empresarial? 

É habitual que os emprendedores busquen financiamento ao comezo, pero é máis importante validar o teu proxecto no mercado. Se necesitas financiamento has de comprobar que realmente é necesario e cuantificalo.

Que papel xoga a planificación financeira no éxito a longo prazo dunha empresa? 

Unha boa planificación financeira non che garante o éxito, pero diminúe as posibilidades de fracaso. Hai que proxectar os nosos ingresos e gastos os próximos anos para saber que nos imos a atopar. Tamén é importante saber que escenario imos ter se temos máis ou menos ingresos a nivel de beneficio e tamén a nivel de tesourería.

Cales son as fontes de financiamiento máis adecuadas para os novos emprendedores e que criterios deben considerar ao elixilas? 

En cada fase do proxecto aparecen diferentes fontes de financiamento. Ao comezo, nunha fase preliminar-semente ou semente as fontes de financiamento son as tres F: family, fools and friends. Máis adiante, cando se valida o proxecto e se comeza a facturar, aparecen os business angels e similares, que analizan proxectos que poidan ser escalables en diferentes roldas de financiamento. Por último, entraría o financiamento bancario máis tradicional.

É vostede mentor en diferentes programas, como Youth Business Spain ou Turislab, a aceleradora de proxectos turísticos da Xunta. Que lle achega a un novo empresario participar nun programa de mentoring? 

Sobre todo, experiencia de profesionais expertos na materia que os acompañan nos seus primeiros pasos como emprendedores. Esta fase é crítica porque emprender en solitario pode resultar realmente difícil. O mentor é a ferramenta para dar pasos máis seguros.

A Xunta impulsa a nova Oficina Económica de Galicia, un portelo único que permite reducir ata un 50% os trámites burocráticos e o tempo de tramitación de expedientes administrativos. Como cre que impactará no tecido emprendedor da Comunidade? 

Todas as actuacións das administracións que leven a reducir tanto a carga administrativa como económica nos seus inicios facilitará, sen ningunha dúbida, que os novos proxectos teñan máis posibilidades de saír adiante e xerar riqueza. A Xunta ten diversos programas de formación e axuda moi útiles á hora de emprender.