Inicio
Actualidade

Ao día!

03/06/2024

TMC Cancela, innovación e liderado en maquinaria agrícola e forestal

Comparte este artigo

TMC Cancela, con sede en Tordoia (A Coruña) e galardoada na categoría de Empresas dos Premios Galicia de Innovación e Deseño 2022, consolidouse como unha das principais empresas europeas na fabricación de trituradoras agrícolas e forestais

Fundada en 1971 por Manuel Cancela García e a súa esposa Consolo Rodríguez Fernández, a empresa comezou como un pequeno negocio familiar dedicado á produción e mantemento de maquinaria agrícola. Ao longo dos anos, evolucionou ata converterse nun referente internacional, con presenza en máis de 50 países e liderado en mercados como Francia e Alemaña.

Desde os seus inicios, TMC Cancela caracterizouse polo seu forte compromiso coa investigación, o desenvolvemento e a innovación (I+D+i). Esta orientación cara á vangarda tecnolóxica permitiu á empresa desenvolver máis de 500 modelos de rozadoras e trituradoras, moitos deles patentados, que responden ás necesidades máis esixentes do sector agrícola e forestal. A calidade e a robustez das súas máquinas son consecuencia da incorporación dos avances técnicos máis relevantes nos seus procesos produtivos.

A estratexia de expansión e internacionalización de TMC Cancela foi clave no seu crecemento, posto que a empresa exporta hoxe en día máis de 2.000 unidades anuais desde a súa planta central en Galicia e conta con almacéns loxísticos en California e Rusia, o que lle posibilita ofrecer un servizo inmediato en ambos os mercados. 

Parte esencial da filosofía de TMC Cancela é tamén a súa adaptabilidade e capacidade de resposta ante as demandas cambiantes do mercado. A empresa escoita activamente á súa clientela e adapta os seus produtos para ofrecer solucións que non só cumpran coas expectativas de rendemento e eficiencia, senón que tamén promovan a sustentabilidade ambiental, o que se reflicte nos seus investimentos continuos en I+D+i, buscando sempre mellorar a eficiencia enerxética e a funcionalidade dos seus equipos.

A integración do deseño na súa estratexia empresarial foi recoñecida co galardón na categoría de Empresas dos Premios Galicia de Innovación e Deseño 2022, polo desenvolvemento de varias patentes no ámbito da robótica agraria e forestal e maquinaria, especialmente nas trituradoras, que se comercializan en 150 países, testemuño do éxito do seu enfoque na innovación como motor de desenvolvemento e competitividade.

TMC Cancela constitúe un referente en canto ao espírito innovador e empresarial da nosa comunidade. O seu crecemento desde un pequeno negocio familiar ata converterse en líder de fabricación de maquinaria agrícola e forestal en Europa e máis aló demostra a súa capacidade para adaptarse e prosperar nunha contorna cada vez máis competitiva e globalizada. Apostando polo seu compromiso coa calidade, a innovación e a satisfacción do cliente, TMC Cancela estableceu un modelo para seguir en termos de expansión e integración da innovación no seu segmento.

Tamén pode interesarche